Эмлаш олгандан кейин поликлиникада узоқ вақт қолиш турли хил юқумли касалликларни юқтириб олиш хавфини оширади. Бу борада Санитария-эпидемиология қўмитаси огоҳлантириш билан чиқди.

Хабарда айтилишича, одатда шифокор эмлашдан кейинги реакциялар пайдо бўлса, ўз вақтида ёрдам кўрсатиш мақсадида 30 дақиқа кутиб туришни таклиф қилади, бу вақтда даволаш-профилактика муассасаси ичида эмас, балки атрофида кутиб туриш мақсадга мувофиқ ҳисобланади.

«Санепидқўмита» эмлаш учун олиб келинган болани қалин кийинтирмаслик, поликлиникага келган вақтида терламаган бўлиши, агар терлаган бўлса, барча иссиқ кийимларини ечиб, болани терини қотишини кутишни тавсия қилган.

Шунингдек, болага шарбатлар бериш ҳам мумкин эмас, чунки бу эмлашдан кейин организмни қарши курашишини кучайтириб, вакцинага кўникишини узоқлаштиради. Агар бола кучли терлаган бўлса, боланинг танасини илиқ сувга ботирилган сочиқ билан, кейин қуруқ сочиқ билан артиб, танада намлик қолмаслигини кутиш лозим. Тана ҳарорати одатдагидек бўлса, болани ҳар доимгидек чўмилтиришингиз мумкин.

Эмлаш олгандан кейин, одатда 3 кун мобайнида кўп одамлар йиғиладиган жойларга бориш, кўпчилик билан бирга бўлиш тавсия этилмайди.

«Болани меҳмонга олиб борманг, уйга бувиси ва буваси ёки ўртоқларингизни таклиф қилманг. МТТга 2 кунгача олиб бориш тавсия этилмайди, агар бола ўзини яхши ҳис қилса қўрқмасдан олиб бориш мумкин. Бола эмлаш олгандан кейин аниқ юқумли касалликлар белгилари йўтал, акса уриш, ич кетиши ва бошқа белгилар бўлган одамлар билан мулоқотда бўлишини олдини олиш керак», — дейилади қўмита хабарида.

Эмлашдан кейин нима қилиш керак?

• Болани тинчлантириш учун, кўпроқ суюқлик беринг, кўпроқ вақт ажратиб, уни ўйнатинг, ҳаракатларини маъқулланг, яхши гапиринг ва меҳрибон бўлинг. Эмлашдан кейин болани албатта қорнини тўйдириш керак, нафақат вақти бўйича, балки талабига қараб сўраган вақтда.
• Агар, болада эмлашдан кейин ҳарорат кўтарилса, унга иссиқ туширувчи дорилар беринг. Тана ҳарорати юқори бўлса, ҳаво ҳарорати юқори бўлмаган хона шароитини яратинг. Эмлашдан кейин бола инжиқлик қилмаса, уйга кетишни сўрамаса, тоза ҳавода сайр қилдиринг.