Нидерландиянинг Вейк-ан-Зее шаҳри мезбонлик қилган шахмат бўйича анъанавий «Tata Steel Chess 2025» мусобақаси ўз якунига етди.

Унда «Masters» гуруҳида 3-ўринни эгаллаб турган Нодирбек Абдусатторов ҳиндистонлик Пентала Харикришнага қарши баҳс олиб борди ва дуранг натижа қайд этди.

Мусобақанинг сўнги, 13-турида амалдаги жаҳон чемпиони Гукеш Доммараджу ватандоши Аржун Эргаисига имкониятни бой берди. Иккинчи ўриндаги Рамешбабу Праггнанандха ҳам сўнгги турда германиялик Винсент Кеймерга ютқазиб ҳамюртимиз Нодирбек Абдусатторовга чемпионлик учун курашда қулай имконият яратиб берганди.

Афсуски, Абдусатторов ҳамда Харикришнанинг баҳси дурранг билан кифояланди. Нодирбекнинг ушбу баҳсдаги ғалабаси унга чемпионлик тай-брек учрашувларида қатнашиш имкониятини берар эди.

Турнирнинг ҳал қилувчи босқичида 8.5 очкодан жамғарган Гукеш ва Рамешбабу ўртасидаги тай-брекда Прагнанандҳа 2:1 ҳисобида ғалаба қозониб, «Tata Steel Chess 2025» чемпионлигини қўлга киритди.

Гукеш Доммараджу иккинчи ўринни банд этган бўлса, Нодирбек Абдусатторов 8 очко билан учинчи поғонани эгаллади.

Яна бир ҳамюртимиз, «Chellengers» гуруҳида қатнашган Нодирбек Якуббоев 8 очко билан қўшимча кўрсаткичларга кўра 4-ўринни эгаллади. Якуббаев мусобақанинг якуни арафасида фаоллик кўрсатиб, кетма-кет учта партияда ғалабага эришди. Аммо мусобақа аввалида бой берилган очколар Якуббаевни совриндорлар қаторидан тушиб қолишига сабаб бўлди.

«Chellengers» гуруҳида Чехиялик Ван Нгуен ва озарбайжонлик Айдин Сулейманли якунда 9,5 очкодан жамғаришди. Тай-брекда Нгуеннинг қўли баланд келиб, «Chellengers» гуруҳи чемпионига айланди. Якуббоевдан ярим очко кўп жамғарган нидерландиялик Эрвин Лъами 8,5 очко билан учинчи ўриндан жой олган.