Foto: Xalq so‘zi

Andijon viloyati Baliqchi tumanida “Yashil makon” umummilliy loyihasi doirasida 1 ming 471 ta ehtiyojmand oilaga salkam 15 ming tup koʻchatlar bepul tarqatilmoqda.

— Hududlarni koʻkalamzorlashtirish xonadonlardan boshlanishi kerak, — deydi Baliqchi tuman hokimligi matbuot xizmati rahbari Muzaffarbek Karimov. — Shu bois har bir oilada mevali daraxtlarning parvarishlanishi maqsadga muvofiqdir. Tan olish kerak, bu borada hammada imkoniyat yetarli emas. Shu bois salkam bir yarim mingta xonadonda mevali daraxtlar koʻchatlari ekishga zarurat va ehtiyoj borligi aniqlanib, ularga amaliy yordam koʻrsatilmoqda. Hozirga qadar 6 ming tup koʻchatlar yetkazilib, hasharchilar yordamida ekib berildi.

Aytish joiz, tumanda ortda qolgan davr mobaniyda manzarali daraxt koʻchatlaridan tashqari 1 million tup mevali daraxtlar koʻchatlari ekildi. Shuningdek, dalalar chetiga 300 ming tup tut koʻchatlari oʻtqazildi. “Yashil makon” umummilliy loyihasi doirasida kuz mavsumi davomida bu koʻrsatkichlar kun sayin ortmoqda.

Saminjon HUSANOV, “Xalq soʻzi”.