Maktabgacha va maktab taʼlimi vazirligi tomonidan Xorazm viloyatidagi 61 ta umumtaʼlim maktabiga kompyuter jamlanmalari, koʻp funksiyali printer va kondensionerlar yetkazib berildi. Kompyuter vositalari maʼnan va jismonan eskirgan umumtaʼlim maktablari uchun moʻljallangan zamonaviy jihozlar yangi oʻquv yili oldidan yoshlarga munosib sovgʻa boʻldi.

Endilikda ushbu maktablarda taʼlim oladigan oʻquvchilar raqamli texnologiyalar va IT asoslarini yanada mukammal oʻrganish imkoniyatiga ega boʻlishdi.

— Umumtaʼlim maktablarining bosqichma-bosqich eng zamonaviy kompyuter vositalari bilan taʼminlanayotgani yoshlarimizning IT sohasida yuqori natijalarga erishishida muhim omil boʻlmoqda, — deydi viloyat maktabgacha va maktab taʼlimi boshqarmasi boshligʻi Hamro Bektemirov. — Bugungi kunda viloyatimizda yoʻlga qoʻyilgan “Muhammad al-Xorazmiy vorislari” loyihasi doirasida 4 ming nafar 7-11-sinf oʻquvchilari IT sirlarini chuqur oʻrganmoqda. Maktablarga yetkazib berilgan yangi kompyuter jihozlari mazkur loyihaning imkoniyatlarini yanada kengaytiradi. Bir soʻz bilan aytganda, yaqin kelajakda IT sohasi oʻnlik sanoq sistemasi va algoritm Vatani boʻlgan yangi Xorazmning “tashrif qogʻozi”ga aylanadi.

Odilbek ODAMBOYEV

“Xalq soʻzi”