Bosh prokuratura huzuridagi Departamentning Yakkasaroy tuman bo‘limi, DXX va IIB xodimlari hamkorligida tezkor tadbir o‘tkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, o‘tkazilgan tezkor tadbir davomida qonunga xilof ravishda dori vositalari savdosi bilan shug‘ullanib kelgan fuqaro G.D. fuqaro A.T.ga tarkibida “sibutramin” kuchli ta’sir qiluvchi moddasi bo‘lgan 2 turdagi dori vositasini 800 ming so‘mga sotgan vaqtida qo‘lga olingan.

Shuningdek, tekshiruv davomida uning boshqaruvidagi “Lacetti” rusumli avtomashinasi salonidan sotish maqsadida olib kelingan turli nomdagi xorijda ishlab chiqarilgan jami 1 ming 71 dona dori vositalari ashyoviy dalil sifatida rasmiylashtirilgan.

Hozirda mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, tergov harakatlari boshlab yuborilgan.