Ayni damda Xalq deputatlari Toshkent shahar kengashining 104-sessiyasi boʻlib oʻtdi. Bu haqda shahar hokimligi xabar berdi.

Qayd etilishicha, sessiyada dastlab Toshkent shahar hududiy saylov komissiyasining raisi Abdulla Magrupov «Toshkent shahrida boʻshab qolgan deputatlik oʻrinlariga boʻlib oʻtgan saylov natijalari toʻgʻrisida» maʼlumot berdi.

Berilgan maʼlumotga koʻra, Toshkent shahri, Yunusobod tumani «Turkiston-53» saylov okrugida boʻshab qolgan deputatlik oʻrniga Oʻzbekiston Liberal-demokratik partiyasidan nomzodi koʻrsatilgan Shavkat Boʻronovich Umurzakov Xalq deputatlari Toshkent shahar Kengashining deputati etib saylangani aytib oʻtildi.

«Shuningdek, sessiya kun tartibidan Yakkasaroy va Yangihayot tumanlaridagi ayrim aholi punktlarining tarkibiy qismlarini nomlash va qayta nomlash toʻgʻrisida, Toshkent shahridagi muqobil korxonalar tomonidan maishiy chiqindilarni toʻplash va olib chiqish xizmatlarini takomillashtirish, Xalq deputatlari Kengashida huquqni muhofaza qiluvchi organlarning hisobotini eshitish kabi poytaxtimiz ijtimoiy-iqtisodiy hayotiga oid qator masalalar oʻrin olgan», deyiladi xabarda.