Foto: Alixan Utarbekov/“Xalq soʻzi”

Taniqli adib Xurshid Doʻstmuhammad tabarruk 70 yoshni qarshiladi.

Yozuvchi zamonaviy oʻzbek adabiyotining koʻzga koʻringan vakillaridan biri sanaladi. Uning “Bozor” romani, “Nigoh”, “Panoh” kabi qissalari, “Jajman” va boshqa hikoyalari adabiy jamoatchilik tomonidan oʻzbek nasrining yutuqlari sifatida yuksak baholangan.

“Jimjitxonaga yoʻl”, “Beozor qushning qargʻishi”, “Jim oʻtirgan odam” hikoyalari adibning keyingi yillar ijodida yangi sahifa ochdi. “Qichqiriq” (2014) toʻplami, “Donishmand Sizif” (2016) romani adabiyotimizda yaratilgan jiddiy, yetuk asarlar sifatida eʼtirof etildi.

Xurshid Doʻstmuhammad Oliy Majlis Qonunchilik palatasi deputati sifatida ham xalqimizga xizmat qilib kelmoqda.

Serqirra ijodkor nafaqat yozuvchi, balki qalami oʻtkir publitsist, “Xalq soʻzi” va “Narodnoye slovo” gazetalarining doimiy muallifi hamdir. Uning dolzarb mavzulardagi materiallari gazetalarimizda muntazam chop etib kelinadi. Tahririyatimiz jamoasi sevimli adibimizga mustahkam sihat-salomatlik, yangi-yangi ijodiy muvaffaqiyatlar tilaydi.

“Xalq soʻzi”.