SpaceX sunʼiy intellekt uchun moʻljallangan, quyosh energiyasida ishlaydigan sunʼiy yoʻldosh data-markazlarini yaratishda FCCʼdan ruxsat soʻramoqda. Bu haqda Reuters agentligi xabar berdi.

Qayd etilishicha, Ilon Maskka tegishli SpaceX kompaniyasi AQSHning “Federal aloqa komissiyasi” (FCC)ga murojaat qilib, sunʼiy intellekt ehtiyojlari uchun moʻljallangan, quyosh batareyalari bilan ishlaydigan maʼlumotlarni qayta ishlash markazlarini tashkil etishga ruxsat soʻragan.

Komissiyaga taqdim etilgan hujjatlarga koʻra, SpaceX sunʼiy intellekt asosida ishlaydigan data-markazlarni elektr energiyasi bilan taʼminlash uchun quyosh energiyasidan foydalanishni rejalashtirmoqda. Loyiha kompaniyaning yerdagi va ehtimol, kelajakdagi kosmik infratuzilmasi bilan bogʻliq boʻlishi mumkin.

Taʼkidlanishicha, SpaceX haqiqatan ham 1 million sunʼiy yoʻldoshni orbitaga chiqarishi ehtimoli past. Biroq texnologiya kompaniyalari koʻpincha amalda kerak boʻladiganidan koʻproq miqdorga ruxsat soʻrab, keyinchalik ishlab chiqish va rejalashtirish jarayonida harakat imkoniyatini saqlab qolishga intiladi.