Ahmadali SHERNAZAROV/“Xalq soʻzi”. Joriy yilda Sirdaryo viloyatida 73 ming gektar maydonda gʻoʻza oʻstirilmoqda. Ekish erta bajarilgan dalalardagi gʻoʻzalar allaqachon gulga kirib, hosil tugishni boshlagan. Eʼtiborlisi, 22,7 ming gektarga chigit Xitoy-Shinjon texnologiyasi asosida plyonka ostiga ekildi.

Aytish lozimki, ayni texnologiya meliorativ holati yomonlashgan yerlarda ham yuqori hosil olish, yaʼni ana shunday maydonlarni yana foydalanishga qaytarish imkoniyatini bermoqda. Oʻtgan yili Sirdaryo viloyatidagi foydalanishdan chiqqan 1200 gektar yerga Xitoy agrar tajribasiga tayanilgan holda chigit ekilgan edi. Bu texnologiya tuproq unumdorligini tiklashda, suvdan samarali foydalanish va moʻl hosil yetishtirish boʻyicha yuqori natijasini berdi: har gektardan oʻrtacha 50-55 sentner paxta terib olindi.

Mirzaobod tumanida bu yil tashkil etilgan “Sirdaryo Jingu” masʼuliyati cheklangan jamiyatiga 4 ming 333 gektar ana shunday holati ogʻir yerlar biriktirildi. Ayni kunlarda ushbu maydonlarda gʻoʻzalar gullab, hosil toʻplashga kirdi.

— Xitoy texnologiyasining afzalliklari koʻp, — deydi Mirzaobod tumani hokimi oʻrinbosari Sardor Saidumarov. — Ushbu usulda bir gektar maydondagi koʻchat miqdori ancha koʻp, yaʼni 220 mingtadan ziyod boʻladi. Bu esa hosildorlikni yuqori boʻlishida eng asosiy omillardan biri. Qolaversa, ushbu qoʻshqator usuli agrotexnik tadbirlarning sifatli va kam xarajatli boʻlishini ham taʼminlaydi. Masalan, tomchilatib sugʻorish tufayli suvdan tejamli foydalanilishi barobarida bu ish juda sifatli hamda qisqa vaqtda bajarilmoqda.

Aytish lozimki, bu yil viloyatdagi ayni usulda, yaʼni Xitoy texnologiyasi asosida parvarishlanayotgan paxta maydonlarida hosildorlik 60-70 va hatto 80 sentnerga yetkazilishi kutilmoqda.