Samarqand shahridagi Bogʻibaland turizm mahallasida oʻtkazilgan “Anjir sayli”da vitamin va minerallarga boy boʻlgan anjir yetishtirish, uni qayta ishlash hamda agroturizm sohasini rivojlantirishga alohida eʼtibor qaratildi. Ilgʻor agrotexnologik tajribalar namoyish qilinib, dehqon va fermer xoʻjaliklari vakillari uchun seminarlar tashkil etildi.

— “Anjir sayli” ushbu mevani yetishtirishni ommalashtirish, yoʻqolib ketayotgan noyob turdagi anjir koʻchatlarini koʻpaytirishda muhim ahamiyat kasb etadi, — deydi Samarqand viloyati hokimining oʻrinbosari Rustam Qobilov. — Bogʻbonlarimiz tomonidan yangicha, in-vitro usulda parvarishlangan 6 oylik koʻchatlar bepul tarqatildi. Tadbirning yana bir ahamiyatli jihati, bugungi kunda turizm maskaniga aylangan Bogʻibalanddagi anjirzorda oʻtkazilganidir. Unda turli mamlakatlardan kelgan sayyohlar ham ishtirok etdi.

Anjir koʻrgazmasi va undan tayyorlangan sharbat, murabbo hamda turli milliy va Yevropa taomlari barchaga manzur boʻldi. Madaniy dasturlar, folklor jamoalarining chiqishlari va jonli ijrodagi kuy-qoʻshiqlar ishtirokchilarga bayramona kayfiyat bagʻishladi.

“Anjir sayli” Samarqandning qadimiy bogʻdorchilik anʼanalari va milliy merosini keng targʻib etish, hududning turistik salohiyatini yanada oshirishga xizmat qiladi.

Abdulaziz YOʻLDOSHEV,

“Xalq soʻzi”.