Foto: Tergov departamenti

Qoʻqon shahridagi koʻp qavatli uylardan birida sodir boʻlgan portlash yuzasidan jinoyat ishi qoʻzgʻatildi. Bu haqda IIV Tergov departamenti xabar berdi.

Baxtsiz hodisa oqibatida mazkur uyda istiqomat qilgan, 19 yoshli fuqaro beton plita bosib qolishi sababli ogʻir tan jarohati olib, voqea joyida vafot etgan. Boshqa shaxslarning jarohat olgani toʻgʻrisida maʼlumot kelib tushmagan. Hodisa natijasida bir nechta xonadonlarga zarar yetgan.

Xabar asosida hodisa joyiga ichki ishlar organlari hamda boshqa huquqni muhofaza qiluvchi idoralarning masʼul xodimlari yetib borib, yongʻinni bartaraf etish, chaqnashning kelib chiqish sabablarini aniqlash va hodisa joyini koʻzdan kechirish ishlariga kirishgan.

Ichki ishlar vaziri oʻrinbosari Ramazon Ashropov tomonidan voqea joyida tergov-tezkor guruhi tuzilib, masʼul xodimlarga zarur topshiriqlar berilgan. Jumladan, hodisa joyini Jinoyat-protsessual kodeksi talablariga muvofiq hujjatlashtirish, ish uchun ahamiyatga ega boʻlgan narsa va buyumlarni olish, guvohlardan batafsil koʻrsatmalar olish hamda boshqa zarur tergov harakatlarini amalga oshirish vazifalari yuklatilgan.

Mazkur holat yuzasidan Fargʻona viloyati IIB 2-mintaqaviy hudud Tergov boʻlimi tomonidan Oʻzbekiston Respublikasi Jinoyat kodeksining 259-moddasi 2-qismi “a” bandi bilan jinoyat ishi qoʻzgʻatilib, jinoyat ishi Tergov departamenti tomonidan nazoratga olingan.