Foto: “Xalq soʻzi”

Andijon viloyatida aholining ichimlik suvidan qarzdorlik miqdori 119 milliard 607 million soʻmni tashkil etmoqda. Andijon shahri, Andijon, Asaka, Oltinkoʻl tumanlarida, ayniqsa, isteʼmol qilingan ichimlik suvi uchun haq toʻlamagan qarzdorlar safi kengayib bormoqda.

— Asaka tumanida qarzdorlikning salbiy oqibatini aholiga tushuntirish maqsadida targʻibot ishlari olib borilmoqda,ؙ — deydi “Andijon suv taʼminoti” masʼuliyati cheklangan jamiyatining tumandagi filiali boʻlim boshligʻi Azamatjon Qosimov. –Afsuski, bu boradagi eʼtiborsizlik davom etmoqda. Natijada shu yilning avgust oyida isteʼmolchilarga 650 million soʻmlik xizmat koʻrsatilgan boʻlsa, aholi tomonidan foydalanilgan toza ichimlik suvi uchun 361 million soʻmlik toʻlov amalga oshirilgan, xolos. Natijada tuman miqyosida qarzdorlik miqdori 11 milliard 382 million soʻmga yetdi. Qarz koʻpaysa muammo yuzaga keladi, pirovardida arz koʻpayadi.

Taʼminotchi korxonaning isteʼmolchi oldidagi vazifalari boʻlgani kabi aholining ham korxona oldida oʻz burchlari bor. Har bir fuqaro ana shu burchga masʼuliyat bilan yondoshmas ekan, hududlardagi toza ichimlik suvi bilan bogʻliq muammolar ham ortib boraveradi. Bu borada joylardagi mahalla fuqarolar yigʻini mutasaddilari aholi oʻrtasida keng tushuntirish ishlarini olib borishsa, nur ustga nur boʻlardi.

Saminjon HUSANOV, “Xalq soʻzi”.