Illyustrativ foto

Oʻzbekistonda homiylik xayriyalarini yigʻish tartibi belgilandi.

Qonun hujjatlariga kiritilgan oʻzgartirishlar bilan davlat organlarining mansabdor shaxslari tomonidan nodavlat notijorat tashkilotlarining faoliyatiga qonunga xilof ravishda aralashishga javobgarlik belgilandi. Ushbu qonunbuzarlikni sodir etgan shaxslarga BHMning 7 baravaridan 10 baravarigacha jarima solinishi mumkin.

Bundan tashqari, homiylik xayriyalarini yigʻish tartibi aniq belgilandi. Unga koʻra, xayriyalarni yigʻish muayyan homiylik oluvchilarning manfaatlarini koʻzlab, oldindan eʼlon qilingan muddat davomida amalga oshiriladi.

Homiylik tashkilotlari tomonidan homiylik xayriyalarini naqd pul shaklida yigʻish faqat xayriya qutisi yordamida amalga oshiriladi. Bundan naqd pul shaklidagi homiylik xayriyalarini ularning bank hisobvaraqlariga qonunchilikda belgilangan tartibda oʻtkazish hollari mustasno.

Xayriya qutisi shaffof boʻlishi va uni ochish joyi tegishli belgilangan shaxslar shaxs tomonidan imzolangan hamda muhrlangan qogʻozli plomba yoki raqamlangan plomba bilan plombalangan boʻlishi shart.

Ushbu tartibni buzish fuqarolarga BHMning 3 baravaridan 5 baravarigacha, mansabdor shaxslarga esa 5 baravaridan 7 baravarigacha miqdorda jarima solishga sabab boʻlishi koʻzda tutiladi.