Kartoshka yetishtirish davlat tomonidan qoʻllab-quvvatlanadi. Bu haqida “Huquqiy axborot” Telegram-kanali maʼlum qildi.

“Respublikada kartoshka yetishtirishni koʻpaytirish va urugʻchiligini yanada rivojlantirishga doir qoʻshimcha chora-tadbirlar toʻgʻrisida”gi Prezident qarori (269-son, 08.09.2025-y.) qabul qilindi.

Mazkur qarorga koʻra, respublikada kartoshka yetishtirishni koʻpaytirish va urugʻchiligini rivojlantirishning asosiy maqsadli koʻrsatkichlari etib quyidagilar belgilangan:

• 2028-yildan har yili unuvchanlik darajasi 85 foizdan past boʻlmagan kamida 10 mln dona kartoshkaning mini-tuganaklarini yetkazib berish;
• 2030-yilga borib respublikada kartoshkaning oʻrtacha hosildorligini 16–17 tonnadan 25–30 tonnaga oshirish.

Shuningdek, Qishloq xoʻjaligi vazirligi har yili 1-dekabrgacha keyingi yilda yetishtiriladigan kartoshkaning “in-vitro” oʻsimliklari, mikro va mini-tuganaklarining hajmlari boʻyicha ilmiy muassasalar va tadbirkorlarga buyurtma beradi.

2026-yil 1-yanvardan Qishloq xoʻjaligini davlat tomonidan qoʻllab-quvvatlash jamgʻarmasi hisobidan tijorat banklari orqali kartoshka yetishtirish xarajatlarini moliyalashtirish uchun hosil qiymatining 50 foizigacha yillik 12 foiz stavkada 6 oylik imtiyozli davr bilan 12 oy muddatga sugʻurta polisi asosida kreditlar ajratiladi.

Bundan tashqari, 2026-yil 1-yanvardan kartoshka yetishtiruvchilar tomonidan quyosh panellari oʻrnatish xarajatlarining 50 foizigacha, biroq 50 million soʻmdan ortiq boʻlmagan qismi Davlat byudjetidan qoplab berilishi belgilangan.