Qozogʻistonning Ostona shahrida “Yoʻlovchi tashish” va “Oʻztemiryoʻlyoʻlovchi” aksiyadorlik jamiyatlari yigʻilish oʻtkazdi. Unda sheriklik va hamkorlikni mustahkamlash masalalari koʻrib chiqildi.

Muzokaralar yakunida turistik poyezdlarning harakatlanishi toʻgʻrisida kelishuv imzolanib, qoʻshma loyihalarni amalga oshirish boʻyicha ishchi guruh tuzildi. “Jibek joli” sayyohlik poyezdi qatnovining yoʻlga qoʻyilishi birinchi qadamlardan biri boʻldi.

Tomonlar, shuningdek, yangi xalqaro yoʻnalishlar, jumladan, “Ostona-Samarqand” yoʻnalishini ochish imkoniyatlarini koʻrib chiqdilar. Bu davlatlar oʻrtasida turizm rivoji uchun “ildam qadam” boʻlishi mumkin.

Oʻzbekiston taklifi bilan “Olmaota–Toshkent” yoʻnalishidagi 1/2-sonli poyezdning harakatlanish jadvali qayta koʻrib chiqilib, yoʻlovchilar uchun joʻnab ketish va kelish vaqtlari yanada qulaylashtirildi.

Avvalroq Qozogʻiston va Oʻzbekiston oʻrtasidagi yangi temir yoʻl, “Darbaza–Maqtaaral”ni 2027-yilda ishga tushirish rejalashtirilgani haqida xabar berilgandi.

Yangi liniya Oʻzbekiston bilan chegara orqali yuk tashish hajmini oshirish hamda “Sariagʻash–Toshkent” chegara oʻtkazish punkti yukini kamaytirishga qaratilgan boʻlib, loyiha qiymati 545,7 million dollarga baholanmoqda.