Istam IBROHIMOV/“Xalq soʻzi”. Respublikamizning barcha hududlarida Oʻzbek tili bayramiga bagʻishlangan maʼnaviy-maʼrifiy tadbirlar koʻtarinki ruhda oʻtdi.

Buxoro shahridagi Alisher Navoiy haykali poyi erta tongdan anvoyi gullarga burkandi. Bu yerda ona tilimizga davlat maqomi berilganining 35-yilligi munosabati bilan marosim oʻtkazildi.

Unda soʻz olganlar ona tilimizning oʻzligimizni anglashdagi oʻrni va ahamiyati, uning mavqeyini oshirish borasida amalga oshirilayotgan ishlar xususida toʻxtaldi. Talaba-yoshlar tomonidan oʻzbek tili madh etilgan sheʼrlar yod aytildi.

Bayramning asosiy tantanasi esa viloyat musiqali drama teatrida boʻlib oʻtdi. Madaniy-maʼrifiy soha vakillari, tilshunoslar, ijodkorlar, muallimlar, yoshlar vakillari qatnashgan tadbirda “Davlat tili haqida”gi qonunning tarixiy ahamiyati, tilimizni asrab-avaylash qadriyat darajasiga koʻtarilgani, Konstitutsiyada davlat tilining maqomi huquqiy jihatdan mustahkamlab qoʻyilgani toʻgʻrisida soʻz bordi. Shu kabi saʼy-harakatlar natijasida ona zabonimiz dunyo tillari qatorida oʻz oʻrniga ega boʻldi. U xalqaro minbarlarda ham baralla yangrayapti. Galdagi vazifa esa tilimiz sofligini saqlash, uning mavqeyini mustahkamlashdan iboratdir.

Viloyat sanʼat ustalari tomonidan tayyorlangan teatrlashtirilgan bayram dasturi madaniy-maʼrifiy kechaga oʻzgacha fayz bagʻishladi.