Gʻ.Otajonov/“Xalq soʻzi”. Toʻrtkoʻl tumanida Oʻzbekiston, Qoraqalpogʻiston, Turkmaniston va Tatariston xalq artisti, davlat mukofoti sohibi, mohir sozanda va xonanda Otajon Xudoyshukurovning 80-yillik yubileyi munosabati bilan “Ona diyor kuychisi” nomli respublika koʻrik-tanlovi va madaniy tadbirlarning ochilish marosimi boʻlib oʻtdi.

Unda Qoraqalpogʻiston Respublikasi Joʻqorgʻi Kengesi Raisi Amanbay Orыnbayev ishtirok etib, O.Xudoyshukurovning yurtimiz sanʼati rivojiga qoʻshgan hissasi haqida gapirib oʻtdi. Shuningdek, ushbu respublika tanlovi ishtirokchilariga omad tiladi.

Tantanali tadbir avvalida, madaniyat saroyi oldidagi Otajon Xudoyshukurov byusti poyiga gulchambar qoʻyildi. Bundan soʻng madaniy tadbirlarning ochilish marosimi oʻtkazildi.

Unda Otajon Xudoyshukurov yoqimli ovozi, betakror isteʼdodi bilan nafaqat yurtimizda, balki Markaziy Osiyoda mashhur boʻlgani, qisqa umri davomida milliy madaniyatimiz rivojiga salmoqli hissa qoʻshgani va uni dunyo xalqlariga tanitishda faollik koʻrsatgan sanʼatimizning yirik namoyandalaridan biri boʻlgani alohida taʼkidlandi.

Madaniy tadbirlar “Ona diyor kuychisi” nomli respublika koʻrik-tanlovi, sanʼat va madaniyat xodimlari ijrosidagi konsert dasturi bilan davom etdi.