Oliy taʼlim tashkilotlari milliy reytingini yuritishning yangi tartibi belgilanmoqda. Bu haqida Taʼlim nazorati Telegram-kanali xabar berdi.

Maʼlum qilinishicha, Oliy taʼlim tashkilotlari milliy reytingini yuritish tartibi toʻgʻrisidagi nizom loyihasi muhokamalar portaliga joylashtirilgan.

Milliy reyting 2026-yil 1-yanvardan boshlab yuritilishi belgilangan. Milliy reytingda tashkiliy-huquqiy shaklidan qatʼi nazar tashkil etilganligiga uch yil toʻlgan va bitiruvchilarga ega boʻlgan oliy taʼlim tashkilotlari ishtirok etadi. Bundan oliy harbiy va harbiylashtirilgan, ixtisoslashtirilgan oliy taʼlim va ilmiy-tadqiqot muassasalari mustasno hisoblanadi.

Milliy reyting oliy taʼlim tashkilotlarining kontingentiga qarab, ularni toifalarga ajratgan holda yuritiladi. Oliy taʼlim tashkilotlari ijtimoiy-gumanitar fanlar, amaliy fanlar, tibbiyot fanlari va ijod (sport) oliy taʼlim tashkilotlari toifalarga ajratiladi. Oliy taʼlim tashkiloti tomonidan kiritiladigan maʼlumotlar maxsus platformaga har yili 1-fevralga qadar kiritilishi lozim boʻladi.

Milliy reyting natijalari har yili 31-oktyabrga qadar eʼlon qilinadi.

Quyidagi jadvalda oliy taʼlim tashkilotlarining milliy reytingi mezonlari bilan tanishishingiz mumkin: