Ulugʻ ajdodlarimiz tilimiz ravnaqi, uning qadr-qimmati uchun doimo kurashgan. Alisher Navoiy “Muhokamat ul-lugʻatayn” asarida tilimizning naqadar boy va serqirra, nafis va serjilo ekanini, hech bir tildan kam emasligini isbotlagan. Ana shunday bebaho boylikning vorislari sifatida ona tilimizni boyitish, nufuzini yanada oshirish har birimizga katta masʼuliyat yuklaydi.

Binobarin, oʻzbek tilining oʻziga xos nafosatini tarannum etishda, qadri va mavqeni jahon uzra yuksaltirishda ulugʻ shoir, mutafakkir Alisher Navoiy bobomizning beqiyos hissasi asrlar osha eʼtirof etilishi barobarida kelajak avlodlar uchun ham ona tilimizni asrash va eʼzozlashda oliy ibrat namunasi boʻlib qoladi.

Guliston shahrining Alisher Navoiy nomli maskanida boʻlib oʻtgan, Oʻzbek tiliga davlat tili maqomi berilganligining 34 yilligiga bagʻishlangan bayram tantanasi ham buyuk ajdodimizga hurmat-ehtirom koʻrsatishdan boshlandi. Ishtirokchilar mazkur maydondagi hazrat Alisher Navoiy siymosi poyiga gullar qoʻydilar.

Soʻngra bayram tadbiri “Yoshlar markazi”da davom etdi.

Oʻzbek tili bayramiga bagʻishlangan tadbirlar joylarda, oʻquv muassasalari, turli tashkilot va korxonalarda ham boʻlib oʻtmoqda.

Xususan, Oʻzbekiston Jurnalistlar uyushmasi hamda Davlat tilida ish yuritish asoslarini oʻqitish va malaka oshirish markazining Sirdaryo viloyat boʻlimlari hamkorligida Guliston davlat universitetida “Internet nashrlarida davlat tili qoidalariga rioya etilishi” tahliliga bagʻishlangan davra suhbati tashkil qilindi.

Ahmadali SHERNAZAROV, “Xalq soʻzi”.