Bosh prokuratura huzuridagi Departamentning Ohangaron shahri boʻlimi, DXX va Bojxona xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida qonunga xilof ravishda dori vositalari savdosi bilan shugʻullanib kelgan fuqarolar Z.Z. va T.O. Toshkent shahridagi 2 ta xonadonda umumiy bahosi 235,2 million soʻmlik 17 turdagi jami 1 ming 221 dona dori vositalarini sotish maqsadida saqlab kelganliklari aniqlangan.

Shundan soʻng, tezkor tadbir xodimlari tomonidan ushbu dori vositlari ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni oʻtkazish maqsadida ishlab chiqarish, tayyorlash, olish, saqlash, tashish yoki oʻtkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishi qoʻzgʻatilib, tergov harakatlari oʻtkazilmoqda.