Senatning yigirma ikkinchi yalpi majlisida sud hujjatlari va boshqa organlar hujjatlarining ijro etilishi holati yuzasidan Bosh prokuratura huzuridagi Majburiy ijro byurosiga yuborilgan parlament soʻrovi natijalari muhokama qilindi.

Taʼkidlanishicha, senatorlar tomonidan sud hujjatlari va boshqa organlar hujjatlarining ijro etilishi hududlar kesimida oʻrganib chiqilgan.

Bosh prokuratura huzuridagi Majburiy ijro byurosi tomonidan bu borada qator ishlar amalga oshirilgani qayd etildi.

Xususan, joriy yilning oʻtgan davrida jami 18,1 trln. soʻm, shu jumladan, davlat foydasiga 7,5 trln. soʻm amalda undirilib, oʻtgan yilning shu davriga nisbatan umumiy undiruv 2,3 barobarga, davlatga undiruv 2,4 barobarga oshgan.

Joylardagi davlat idoralarining amaliy yordami bilan 16 968 nafar ehtiyojmand qarzdorning 9 751 nafari ish bilan taʼminlangan, 39 nafariga imtiyozli kredit ajratilgan, 366 ta qarzdorlikning toʻlash muddati uzaytirilgan, 6 ta tashkilotga investorlar jalb qilingan.

Shu bilan birga, majburiy ijro sohasida ayrim oʻz yechimini topishi zarur boʻlgan masalalar ham mavjud ekanligi taʼkidlandi. Jumladan:

— sud hujjatlari va boshqa organlar hujjatlarining ijrosi toʻliq va oʻz vaqtida taʼminlanishi;

— jismoniy va yuridik shaxslarga yetkazilgan zararlarni sud hujjatlari va boshqa organlar hujjatlari asosida qoplanishi va ushbu masalani yakuniga yetkazish choralari koʻrilishi;

— aliment qarzdorligi bilan bogʻliq ijro hujjatlarini toʻliq va oʻz vaqtida ijrosi taʼminlab borilishi, shu jumladan, ishsiz aliment toʻlovchilarning bandligini taʼminlash boʻyicha choralar koʻrilishi kabi masalalarga eʼtibor qaratildi.

Oʻz oʻrnida, senatorlar tomonidan ijro tizimiga tegishli idoralar bilan birgalikda axborot texnologiyalarini keng joriy etgan holda ijro tizimida fuqarolarga qoʻshimcha qulayliklar yaratish choralari koʻrilishi zarurligi taʼkidlandi.

Mazkur masala yuzasidan Senatning tegishli qarori qabul qilindi hamda ushbu masala parlament nazoratida qoldirildi.