Foto: Ahmad To'ra

Oʻzbekiston Qurolli Kuchlar akademiyasida “Mard askarga sovgʻa” turkumida chop etilgan kitoblar taqdimoti oʻtkazildi. Unda Mudofaa vazirligi hamda Oʻzbekiston Yozuvchilar uyushmasi vakillari, yozuvchi va shoirlar, adabiyotshunos olimlar, harbiy xizmatchilar va kursantlar qatnashdi.

Tadbirda Prezidentimiz tashabbusi bilan amalga oshirilayotgan mazkur loyiha mamlakatimiz maʼnaviy hayotida muhim ahamiyat kasb etayotgani taʼkidlandi. Kitoblar tez orada barcha harbiy qismlar, okruglar, harbiy taʼlim muassasalariga yetkazilishi qayd etildi.

“Mard askarga sovgʻa” turkumidagi kitoblar ixcham va koʻrkam dizaynga ega boʻlib, harbiy xizmatchilar, askarlar, har qanday kishi doim yonida olib yurishi mumkin. Turkumda bu yil 7 ta kitob nashr etilgan. Ularda oʻzbek adabiyoti vakillarining sheʼr va hikoyalari, dostonlari oʻrin olgan. Mazkur asarlarda vatanparvarlik, mardlik, jasorat, burchga sadoqat, inson shaʼni va qadr-qimmatini ulugʻlash gʻoyalari ustuvor ekani, ularning ahamiyatini yanada oshiradi.

Taqdimotda ona yurtni, istiqlolimizni, bugungi tinch va farovon kunlarimizni tarannum etuvchi kuy-qoʻshiqlar yigʻilganlarga koʻtarinki kayfiyat baxsh etdi.

Mazkur adabiy-maʼrifiy tadbir videokonferensaloqa tizimi orqali Mudofaa vazirligining tegishli harbiy okruglari xizmatchilariga ham onlayn namoyish qilindi.

“Xalq soʻzi”.