Oʻzbekiston Respublikasi Prezidenti Shavkat Mirziyoyevning taklifiga binoan Koreya Respublikasi Prezidenti Yun Sok Yol 13-15-iyun kunlari davlat tashrifi bilan mamlakatimizda boʻladi. Bu haqda Prezident matbuot xizmati xabar berdi.

Maʼlum qilinishicha, tashrif dasturiga muvofiq, Toshkent shahrida boʻlib oʻtadigan oliy darajadagi muzokaralarda Oʻzbekiston-Koreya doʻstlik va alohida strategik sheriklik munosabatlarini yanada rivojlantirishning dolzarb masalalari koʻrib chiqiladi.

Savdo, innovatsiyalar va texnologiyalar almashinuvi, energetika, elektronika va elektrotexnika, kimyo sanoati, qishloq xoʻjaligi, infratuzilmaviy rivojlanish va boshqa ustuvor yoʻnalishlarda amaliy hamkorlikni kengaytirish masalalari eʼtibor markazida boʻladi. Taʼlim, sogʻliqni saqlash, madaniyat, sport va turizm sohalaridagi qoʻshma dasturlar muhokama qilinadi.

Shuningdek, mintaqaviy, shu jumladan “Markaziy Osiyo – Koreya Respublikasi” formatidagi hamkorlik yuzasidan ham fikr almashish rejalashtirilgan.

Sammit yakunlari boʻyicha bir qator hukumatlararo va idoralararo hujjatlar imzolanishi koʻzda tutilgan.

Tashrifning ishbilarmonlik dasturi doirasida Oʻzbekiston va Janubiy Koreya Prezidentlari qoʻshma biznes forumida ishtirok etadilar.

Prezident Yun Sok Yol mamlakatimizning boy madaniy-tarixiy merosi bilan tanishish maqsadida Samarqand shahriga tashrif buyuradi.