-Koʻp yillardan buyon uch oila ikki xonali, sharoiti yoʻq, eski uyda istiqomat qilib kelar edik. Toʻgʻrisi, nochor turmush sharoiti tufayli qiynalardik, ammo imkonini topolmasdik. Tuman hokimidan uy-joyimizni qayta qurish uchun koʻmak soʻradim. Murojaatim inobatga olinib, 4 xonali katta uy qurib berildi. Necha yillik orzularim ushaldi. Bir kun kelib mening shunday chiroyli uyim boʻlishini tasavvur ham qilolmaganman. Buning uchun bizlarni eʼtibordan chetga qoldirmagan davlatimiz rahbariga, viloyat va tuman hokimimizga oʻz minnatdorchiligimni bildiraman.

Quvonch koʻz yoshlari bilan samimiy aytilgan soʻzlar Qumqoʻrgʻon tumani “Surxon sohili” mahallasi fuqarosi Anora Mardanoqulovaga tegishli.

Darhaqiqat, vatan ichida kichkina bir vatan qilish uchun bir nechta insonlar yillar davomida mashaqqatli mehnat evaziga erishadi. Anora opa ham farzandlari bilan mehnatdan qochmaydi, ammo topgani qora qozondan ortmaydi. Boquvchisini yoʻqotgan onaxonning besh nafar farzandi bor. Ijtimoiy himoyaga muhtoj, kam taʼminlangan ushbu oila uy-joyga ehtiyojmand edi.
 

Yurtboshimiz tashabbusi bilan amalga oshirilayotgan kuchli ijtimoiy himoya siyosati natijasida, aholi murojaatlarini tinglash, unga yechim topish bu kabi xalqchil, ezgu ishlar buning yaqqol amaliy ifodasi boʻlmoqda.

Tuman hokimligi tomonidan ushbu xonadon egalariga televizor, kir yuvish mashinasi va muzlatgich sovgʻa qilindi.Bundan tashqari, yangi uyga yangi gilamlar toʻshaldi, yangi koʻrpachalar tikildi.

Xonadon egalaring esa quvonchi cheksiz, qalblarida shukronalik tuygʻusi koʻzlarida aks etdi.Mahalla oqsoqollari ham duoga qoʻl ochib, yurtimiz tinchligi, millatimizga xos boʻlgan mehr-oqibatlilik, ezgu ishlar bardavom boʻlishi uchun niyat qilishdi.

Mehr-muruvvat bayrami boʻlgan Navroʻz arafasida bu kabi xayrli ishlarning amalga oshirilishi ham saxovatpesha, tanti xalqimizga xos boʻlgan fazilatlardandir. Xonadon egalari uchun Navroʻz xayrli kelib qoʻshaloq bayramga aylandi.