Foto: “Xalq soʻzi”

Qarshi shahriga Xitoyda ishlab chiqarilgan 30 dona zamonaviy yoʻlovchi tashuvchi avtobus olib kelindi.

“Sharofiddin-Nurillo” masʼuliyati cheklangan jamiyati tomonidan har biri 80 ming AQSH dollari evaziga xarid qilingan mazkur avtobuslarda 24 tadan oʻrindiq mavjud. Shahar ichidagi yoʻnalishlarda umumiy yoʻlovchi qabul qilish sigʻimi esa 60 kishini tashkil etadi.

— Bu avtobuslar zamonaviy qulayliklarga egaligi bilan boshqalaridan ajralib turadi, – deydi “Sharofiddin-Nurillo” MCHJ ish yurituvchisi Akbar Turdiyev. – Xususan, unda nogironligi boʻlgan shaxslarning oʻz aravachalarida chiqishi va salon ichida erkin harakatlanishi uchun alohida joy mavjud, shuningdek, yoshi katta kishilar uchun alohida qulaylikka ega boʻlgan oʻrindiqlar oʻrnatilgan. Zamonaviy isitish-sovitish tizimlari, kuzatuv kameralari mavjud. Hatto, bir kunda avtobusga qancha odam chiqib-tushganini qayd etib boradigan alohida sensor oʻrnatilgan.

Ayni paytda avtobuslar Qarshi shahri ichidagi yoʻnalishlarda qatnay boshladi. Yaqin kunlarda yana 70 dona xuddi shu rusumdagi avtobus olib kelinishi koʻzda tutilgan.

Bungacha viloyatida 381 dona avtobus aholiga yoʻlovchi tashish xizmatlarini koʻrsatayotgan edi. Endilikda ularning soni 411 taga yetdi.

Jahongir BOYMURODOV, “Xalq soʻzi”.