Foto: NBC News

Soʻnggi bir oy ichida Isroil mudofaa kuchlari qoʻmondonlari gumanitar yordam tarqatish punktlarida xavf tugʻdirmaydigan Gʻazo aholisiga qarata oʻt ochishga buyruq bergan. Bu haqda “Haaretz” gazetasi isroillik harbiylarga tayanib xabar tarqatdi.

Seshanba kuni BMT Inson huquqlari boʻyicha Oliy komissarligining Inson huquqlari boʻyicha boshqarmasi matbuot kotibi Tamin Al-Kitanning aytishicha, 27-mayda AQSH va Isroil hukumati tomonidan “Gʻazo gumanitar jamgʻarmasi” tashkil etilganidan beri Isroil kuchlari tarqatish punktlaridan oziq-ovqat yigʻish uchun kelgan 410 dan ortiq falastinlikni oʻldirgan.

“Gʻazodagi isroillik askarlarning nashrga aytishicha, soʻnggi bir oy ichida armiya yordam tarqatiladigan maydonlar yaqinida falastinliklarga ataylab oʻt ochgan. Zobitlar va askarlar bilan suhbatdan maʼlum boʻldiki, qoʻmondonlar olomonni haydab chiqarish yoki tarqatish uchun qoʻshinlarga oʻqqa tutishni buyurgan, garchi bu tahdid emasligi aniq boʻlsa ham”, — deyiladi gazeta xabarida.

Askarlardan birining aytishicha, Isroil mudofaa kuchlarida axloq qoidalari butunlay buzilgan.

Gazetaning yozishicha, bosh harbiy prokuror vakolatli organga yordam tarqatish punktlarida harbiy jinoyatlar sodir etishda gumon qilinayotgan holatlar yuzasidan tekshiruv oʻtkazishni topshirgan.

Isroil Gʻazoga gumanitar yuklar yetkazib berish uchun masʼul boʻlgan Birlashgan Millatlar Tashkilotining Yaqin Sharqdagi Falastinlik qochqinlarga yordam va ishlar agentligi bilan hamkorlik qilishdan bosh tortdi va AQSHning Gʻazo gumanitar jamgʻarmasi bilan birgalikda HAMAS harakatidan tozalangan hududlarda tarqatish punktlarini ochdi. Jamgʻarmaning taʼkidlashicha, tarqatishlar muntazam ravishda Isroil harbiylarining falastinliklarga qarata oʻt ochishi bilan oʻtmoqda.