Indoneziyaning janubiy markaziy qismida joylashgan Levotobi vulqoni otilib, osmon uzra qalin kul bulutlarini hosil qildi. Hodisa ortidan rasmiylar xavf darajasini eng yuqori bosqichga chiqqanini qayd etib, xavfli hudud radiusini 8 kilometrgacha kengayganini eʼlon qildi.

Indoneziya Geologiya agentligi bayonotida aytilishicha, vulqon 10 ming metr balandlikka qalin kul va issiq gazlar bulutini paydo qilgan. Bu holat odatdagi kunlik 8–10 marotabalik vulqon faolligidan farqli ravishda, ikki soat ichida 50-marta portlash bilan kuzatildi. Issiq kul va tutun katta qoʻziqorin shaklidagi bulut hosil qilgan boʻlib, u 90 dan 150 kilometrgacha uzoqlikdagi shaharlar osmonida ham koʻringan.

Hozircha bu voqeada hech kim jabrlanmagani xabar qilindi. Biroq rasmiylar kuchli yogʻingarchilik holatida vulqon atrofidagi daryolarda lava aralash loy oqimlari – yaʼni lahar xavfi kuchayishini aytib, aholini ogohlantirishmoqda.

Eslatib oʻtamiz, ushbu vulqon noyabr oyida ham otilib, 9 kishining oʻlimiga sabab boʻlgan va yana oʻnlab kishilar jarohatlangan edi. Shuningdek, u joriy yil mart oyida ham faollik koʻrsatgan. Levotobi 1584 metr balandlikdagi togʻ boʻlib, Flores tumanida joylashgan.

Indoneziya 270 million aholiga ega orollar davlatidir. U “Olov halqasi” deb ataluvchi Tinch okeani boʻylab joylashgan seysmik faollik hududida joylashgani sababli, bu yerda tez-tez zilzila va vulqon otilishlari sodir boʻladi. Mamlakatda hozirda 120 ta faol vulqon mavjud.