Toshkent va Jizzax viloyatlarida tabiiy gazdan noqonuniy foydalanish holatlari fosh etildi. Bu haqda Elektr energiyasi, neft mahsulotlari va gazdan foydalanishni nazorat qilish inspeksiyasi xabar qildi.

Inspeksiyaning Toshkent viloyat hududiy boshqarmasi tomonidan oʻtkazilgan nazorat tadbirida Parkent tumanida joylashgan “S. S. B.” MCHJga qarashli binoning gaz uskunalari hisoblagichiga tashqi taʼsir koʻrsatilib, tabiiy gazdan noqonuniy foydalanib kelayotganligi aniqlandi.

Ushbu qoidabuzarlik natijasida dastlabki hisob-kitoblarga koʻra gaz taʼminoti korxonasiga 999,2 million soʻmlik zarar yetkazilganligi maʼlum boʻldi.

Boshqa bir holatda esa, inspeksiyaning Jizzax viloyat hududiy boshqarmasi tomonidan oʻtkazilgan nazorat tadbirida “G. S.” MCHJga qarashli binoning gaz uskunalari hisoblagichdan tashqari gaz quvuriga yashirincha montaj qilish orqali ulanib, tabiiy gazdan noqonuniy foydalanib kelayotganligi maʼlum boʻlgan.

Buning natijasida dastlabki hisob-kitoblarga koʻra gaz taʼminoti korxonasiga 1 milliard 245 million soʻmlik zarar yetkazilgan.

Hozirda ikkala vaziyat yuzasidan huquqni muhofaza qilish organlari tomonidan tergovga qadar tekshiruv ishlari olib borilmoqda.