Oʻzbekiston Respublikasi Hisob palatasi faoliyati takomillashtirilayotganligi munosabati bilan ayrim qonun hujjatlariga oʻzgartish va qoʻshimchalar kiritildi.

Qonun bilan Byudjet kodeksiga kiritilgan oʻzgartirishga koʻra, endilikda Hisob palatasi byudjet tizimi byudjetlarining hamda belgilangan tartibda tashkil etilgan boshqa jamgʻarmalarning daromadlarini koʻpaytirish zaxiralarini zamonaviy axborot-kommunikatsiya texnologiyalarini qoʻllamasdan ham aniqlash va safarbar qilishni amalga oshirishi mumkin.

Shuningdek, “Oʻzbekiston Respublikasining Hisob palatasi toʻgʻrisida”gi Qonunga kiritilgan oʻzgartish va qoʻshimchalarga koʻra, Hisob palatasi:

● yashirin iqtisodiyotni qisqartirishga qaratilgan choralarning amalga oshirilishini oʻrganadi hamda nazorat qiladi;

● davlat boshqaruv organlarida, shuningdek ustav fondida (ustav kapitalida) davlat ulushi 50 foiz va undan ortiq boʻlgan muassasa va tashkilotlarda korrupsiyaga qarshi kurashish boʻyicha ichki nazorat tizimini joriy qilish, uning samarali faoliyat koʻrsatishiga doir choralarning amalga oshirilishi ustidan nazorat qiladi.

Qonun bilan Hisob palatasining bir qator koʻshimcha funksiyalari, jumladan, davlat xaridlari toʻgʻrisidagi qonunchilik talablarining toʻgʻri qoʻllanilishi ustidan davlat nazoratini amalga oshirish sohasidagi funksiyalari belgilandi.