Gruziya sudi mamlakatning sobiq prezidenti Mixail Saakashvilini yana toʻqqiz yilga ozodlikdan mahrum etish haqida qaror chiqardi. U davlat mablagʻlarini talon-toroj qilishda aybdor deb topildi. Bu haqda Reuters axborot agentligi xabar bergan.

Saakashvili 2021-yil Gruziyaga qaytganidan soʻng, avvalgi ayblovlar asosida olti yillik qamoq jazosiga hukm qilingan edi. Uning yangi hukm bilan umumiy jazo muddati sezilarli darajada oshdi. Sobiq prezident koʻp vaqt davomida qamoqxonadagi kasalxonada davolanib kelgan.

Saakashvili ustidan sud muhokamasi jiddiy tortishuvlarga sabab boʻldi. Sud qaror eʼlon qilinganidan soʻng, uning tarafdorlari hukmga norozilik bildirdi. Gruziya telekanallari sud zalidagi tartibsizliklar va qoʻlga olinganlar haqida xabar tarqatdi. Uning tarafdorlari sudyani hukumatning “quli” deb atadi.

Mixail Saakashvili 2003-yildagi “Atirgul inqilobi” ortidan hokimiyat tepasiga kelgan va Gruziyani Gʻarbga yoʻnaltirgan siyosatchi sifatida tanilgan. 2004-2013-yillarda mamlakat prezidenti sifatida davlat sektorini isloh qilish va iqtisodiy rivojlanish yoʻlida faol harakat qilgan. Uning islohotlari Gruziyada korrupsiyani kamaytirishga va davlat boshqaruvini samarali qilishga yordam bergandi.

Shunga qaramasdan, uning hukmronligining keyingi yillarida mamlakatda avtoritarlik va politsiya zoʻravonligi kuchaygani kuzatilgan. Shuningdek, 2008-yilda Rossiya bilan yuz bergan qisqa, ammo halokatli urush uning obroʻsiga jiddiy putur yetkazgan.

Saakashvili 2012-yilda siyosiy hokimiyatni raqibi, milliarder Bidzina Ivanishvili boshchiligidagi koalitsiyaga topshirgan. Shundan soʻng, u Gruziyadan ketib, Ukrainadan qoʻnim topgandi. Kiyevda u bir muddat Odessa gubernatori sifatida ishlagan, ammo Ukraina hukumati bilan kelishmovchilik tufayli lavozimini tark etgan.

Saakashvilining yana bir necha yilga qamoq jazosiga hukm qilinishi Gruziyadagi siyosiy ziddiyatlarni yanada kuchaytirishi mumkin. Mamlakatda uning tarafdorlari hanuz faol va hukumatning bu qarorini siyosiy qasos sifatida baholamoqda.

Boshqaruvda Bidzina Ivanishvilining taʼsiri kuchli boʻlib, uning siyosiy yoʻnalishi hozirgi hukumatni shakllantirgan. Saakashvilining qamoqda qolishi va unga nisbatan chiqarilayotgan yangi hukmlar Gruziyaning ichki siyosiy barqarorligiga qanday taʼsir qilishini vaqt koʻrsatadi.