Foto: Botir Madiyorov / Xalq so'zi

Fargʻona viloyati hokimi Xayrullo Bozorov Germaniya Federativ Respublikasining mamlakatimizdagi Favqulodda va muxtor elchisi janob Tilo Klinnerni qabul qildi.

– Germaniya iqtisodi, sanoati, madaniyati yuksak darajada rivojlangan, jahon hamjamiyatida juda katta obroʻ-eʼtiborga ega davlat, - dedi Xayrullo Bozorov. – Mamlakatimiz taraqqiyotining yangi bosqichida Yevropa Ittifoqi, xususan, Germaniya bilan ikki tomonlama manfaatli munosabatlarimiz tobora rivojlanib borayotgani barchamizni quvontiradi.

Taʼkidlash oʻrinliki, hamkorlik aloqalari rivojida Fargʻona viloyatining ham oʻrni bor. Bugungi kunda viloyatda germaniyalik tadbirkorlar bilan birgalikda qator istiqbolli loyihalar amalga oshirilayotgani fikrimizning yorqin tasdigʻidir.

Uchrashuvda viloyat rahbari oʻzaro hamkorlik aloqalarini sifat jihatdan yangi bosqichga koʻtarish maqsadida “Yoʻl xaritasi” ishlab chiqib, tadbirkorlik, sanoat, taʼlim va tibbiyot, qishloq xoʻjaligi tarmoqlari boʻyicha loyihalarni amalga oshirish taklifini ilgari surdi.

Oʻz navbatida janob Tilo Klinner mamlakat hududlariga ilk tashrifini Fargʻona viloyatidan boshlaganidan mamnunligini aytib, Oʻzbekiston-Germaniya oʻrtasida koʻp qirrali hamkorlik aloqalarini rivojlantirishga munosib hissa qoʻshishga tayyor ekanligini bildirdi.

Botir MADIYOROV, “Xalq soʻzi”.