10-may — Oʻzbekiston xalq shoiri

Gʻafur Gʻulom tavallud topgan kun

Gʻafur Gʻulom oʻzbek adabiyoti, ayniqsa, sheʼriyatida alohida oʻrin tutadigan shoirdir. Uning bitiklarida zamona va insoniy fazilatlar tarannumi, falsafiy fikrlar, koʻngil hislarining erkin mushohadasi yaqqol sezilib turadi. Qayd etish joizki, ijodkorning nasriy asarlari ham xalqimiz koʻnglidan munosib oʻrin egallagan.

Aminmizki, adib nomi yuraklardan oʻchmaydi, asarlari qayta-qayta oʻqilib koʻngillarga zavq-u shavq bagʻishlayveradi.

BAHOR OHANGLARI

Oʻrik gullarini emar bolari,

Nasrin yaprogʻida titraydi shabnam,

Ipak qurt tuxmida hayot asari,

Olam nikoh oqshom bir zebo sanam.

Ilk koʻklam fayzini sozga solmoqqa

Tanbur kosasida sharob kerakdir.

Damlar mazmunini qamrab olmoqqa

Dunyoday kattakon kitob kerakdir.

Atlasday tovlangan yonbagʻir qirlar,

Bepoyon gul gashtin sursa necha doʻst,

Oʻzligin unutgan oshiq-maʼshuqlar

Yalakat danakday qoʻshmagʻiz bir poʻst.

Navroʻzi bedona oʻrganchik sayrar

Yanglish chuchutlarda sevgi ohangi.

Yosh irmoq sohilga tilini qayrar,

Quyosh nusxalidir muhabbat rangi.

Tongotar ufqni loladay yirtar

Tinmagʻur mehnatning zabardast tovshi.

Har yerda hukmron tanti va lobar

Omonlik zamonning yenguvchi ishi.

MENING BIR SATRIM

Qalbimda qimmatli bolalarimning

Kapalak singari shoʻxliklari koʻp.

Ularning manglayi baxtimday mahbub,

Oʻpib erkalayman oʻz lablarimni…

Biror tong bittasi yoʻtalib qolsa,

Jonimni hovuchlab dilim uradi.

Yarim dam koʻzimdan yoʻqolib qolsa,

Tugʻma chanqov kabi tilim quradi.

Topmasdan qoʻymayman bolalarimni,

Chamanim zinnati lolalarimni.

Ularku shoʻxlikda kapalakdan zoʻr!

Ammo topoldimmi, sezaman huzur…

Har bolam ufurgan nafasin atri —

Sheʼrimning eng yetuk, eng yaxshi satri.

SAMAD VURGʻUNGA

Sharafli bu oʻlkaning muhit kabi koʻkini

Porloq yirik yulduzlar bezab kelmish sarbasar.

Turlab koʻrsang tarixlar karvonining yukini

Oʻz xalqi irfonidan olamga berar xabar.

Qadim otash qadalar muqaddas oʻchogʻida

Sarkarda Bobaklarning soʻnmagan nafasi bor.

Adirlar, vodiylarda, togʻlarning quchogʻida

Magʻlubiyat bilmagan xalqniig gurros sasi bor.

Sevgi boʻlmagan yerda qadrin topolmas jamol,

Na sharob, na musiqiy, na yurakda intizom.

Gʻazalsiz umrlarda iqbolu kamol yoʻqdir,

Qoʻshiqsiz yuraklarda na ehtiros, na ilhom…