Temur ESHBOYEV/“Xalq soʻzi”. Navoiy viloyatining Zafarobod qoʻrgʻonidagi “Yoshlik” madaniyat uyida jinoyat ishlari boʻyicha Navbahor tumani sudi tomonidan ochiq sayyor sud majlisi oʻtkazildi. Unda “Navoiyuran” DK “Zafarobod” kon boshqarmasi rahbariyati va barcha boʻlinmalardan ishchi-xodimlar ishtirok etdi.

Sud majlisida “Zafarobod” KB 6-sonli Avtomobil bazasi chilangari R.M.ning korxonaga ishga kiritish va boʻshatish vakolatiga ega boʻlmasdan turib, boshqa fuqarolarning ishonchiga kirgan holda ulardan kon boshqarmasiga ishga joylashtiraman deb, aldov yoʻli bilan maʼlum miqdorda pul undirganligi boʻyicha jinoyat ishi koʻrib chiqildi.

Sud tomonidan mazkur jinoyat ishi boʻyicha toʻplangan hujjatlar koʻrib chiqilib, ayblanuvchining qilmishidan sidqidildan pushaymonligi va insonparvarlik tamoyillaridan kelib chiqqan holda, qamoq bilan bogʻliq boʻlmagan (oylik maoshining maʼlum qismini davlat hisobiga undirib qolish) jazo tayinlandi.

Majlisda soʻz olganlar kon boshqarmasiga ishga joylashish faqat korxonada belgilangan tartibda amalga oshirilishi, bu kabi masalalarda firibgarlardan ogoh boʻlish lozimligini taʼkidlashdi. Mazkur sayyor sud majlislarini ochiq oʻtkazishdan maqsad esa aybdorga faqat jazo tayinlash emas, balki sodir etilgan jinoiy qilmishning kelib chiqish sabablarini tahlil qilish, mehnatkashlar oʻrtasida huquqiy targʻibotni kuchaytirish hamda jinoyat va huquqbuzarliklarning oldini olishda davlat va jamoat tashkilotlari bilan keng jamoatchilik hamkorligini yanada mustahkamlashdan iboratdir.