Bugungi kunda xalqaro hamkorlik doirasida bir necha turdagi qishloq xoʻjaligi texnikalarini mahalliylashtirish, yangilarini ishlab chiqarish, shu yerning oʻzida yigʻish ishlari amalga oshirilmoqda. Xususan, Fargʻona shahrida joylashgan “Ferghana Swan Cotton Industrial Machinery Stock Co., Ltd” korxonasida xitoylik hamkorlar bilan birgalikda ishlab chiqarilayotgan paxta terish mashinalari fermer xoʻjaliklariga topshirildi.

— Joriy yilda har gektar yerdan olinadigan paxta hosilini 50, yaqin istiqbolda 70-80 sentnerga yetkazishga harakat qilyapmiz, — deydi Fargʻona viloyati hokimi oʻrinbosari Alibek Tursunov. — Oʻtgan yili viloyatda 60 ta shunday texnika boʻlgan boʻlsa, bu yil Fargʻonada ishlab chiqarilayotgan 140 ta “Swan Cotton” paxta terish mashinasini yetkazib berish rejalashtirilgan. Mavsum oldidan fermer xoʻjaliklariga 128 ta mashina topshirildi.

Dastlabki hisob-kitoblarga koʻra, joriy yilda viloyatdagi paxta maydonining 60 foizini mashina bilan terib olish, kelgusi yili ushbu koʻrsatkichni 90 foizga yetkazish mumkin. Paxta terish mashinalarini 20 foizlik dastlabki toʻlov bilan 10-yil muddatga lizing asosida xarid qilish imkoniyati mavjud. Bu borada paxta-toʻqimachilik klasterlari hamda fermer xoʻjaliklariga 15 foizlik subsidiya berilishi qoʻshimcha ragʻbatdir.

Botir MADIYOROV

“Xalq soʻzi”.