Foto: Botir Madiyorov / Xalq so'zi

Fargʻona viloyati hokimi Xayrullo Bozorov Amerika Qoʻshma Shtatlarining Webster universiteti prezidenti, doktor Djulian Shuster boshchiligidagi delegatsiyani qabul qildi.

Taʼlim yoʻnalishida dunyo reytingida yuqori natijalarga erishib kelayotgan Webster xususiy notijorat universiteti 2019-2020 oʻquv yilidan Toshkent shahrida oʻz filialini ochgan. Universitet rahbariyati Fargʻonada ham yana bir filialni tashkil etishni rejalashtirmoqda.

Webster asosan sanʼat, tasviriy va sahna sanʼati, pedagogika, biznes va menejmentni oʻz ichiga olgan turli fanlar boʻyicha bakalavr va magistrlik dasturlari boʻyicha oʻqitadi. Ayni paytda ushbu OTM dunyoning 62 ta shahrida oʻz faoliyatini olib boradi. Taʼlim muassasasining 200 ga yaqin oʻquv dasturlari bor.

Xayrullo Bozorov Margʻilon shahrida faoliyat boshlashi kutilayotgan Webster universiteti filialini kelgusida Fargʻona shahridagi 300 gektar maydonda 40 ming aholiga moʻljallab barpo etilayotgan ekoshaharga koʻchirish maqsadga muvofiq boʻlishini taʼkidladi. Bu taklif universitet prezidenti Djulian Shuster tomonidan mamnuniyat bilan qabul qilindi.

Botir Madiyorov, “Xalq soʻzi”.