Foto: Botir Madiyorov / Xalq so'zi

MDH saylovlarni kuzatish missiyasi shtabi boshligʻi Yevgeniy Kozyakning Fargʻona viloyatiga tashrifi doirasida bir qator uchrashuvlar tashkil etildi.

Xalqaro kuzatuvchi Oʻzbekiston Respublikasi Prezidenti saylovini oʻtkazuvchi 11-Fargʻona okrug saylov komissiyasi faoliyati bilan tanishdi. Y. Kozyak, ayniqsa, okrug saylov komissiyasi huzuridagi matbuot markazida OAV vakillariga yaratilgan qulayliklarni alohida eʼtirof etdi.

Shuningdek, Fargʻona shahrida joylashgan 67-, 95-, 88-saylov uchastkalarida boʻlib, muhim siyosiy jarayonga tayyorgarlik ishlarini yaqindan oʻrgandi. Uchastka saylov komissiyalari raislari bilan suhbatlashdi.

– Oʻzbekistonda Prezident va parlament saylovlarida bir necha bor ishtirok etganman, – deydi Yevgeniy Kozyak. – Yangi Saylov kodeksi oldinda turgan siyosiy tadbirni yanada yuksak darajada, uyushqoqlik bilan oʻtkazish imkonini beradi. Joriy yilning 24-oktabr kuni boʻlib oʻtadigan Prezident saylovi mamlakatingiz hayotida yangi taraqqiyot yoʻlini boshlab berishiga ishonaman.

11-Fargʻona okrug saylov komissiyasi raisi Erkinjon Nuraliyevning maʼlum qilishicha,bu yilgi saylovda 2 million 182 ming 24 nafar fargʻonalik saylash huquqidan foydalanadi. Saylovchilarning 634 ming 586 nafarini 18-30 yoshdagilar tashkil etsa, 141 ming 615 nafari birinchi marta ovoz beruvchi yosh avlod vakillaridir.

Botir MADIYOROV, “Xalq soʻzi”.