Eron Milliy xavfsizlik kengashi kotibi Ali Larijoniy halok boʻlgani tasdiqlandi. Bu haqda uning matbuot xizmati xabar qildi.

Qayd etilishicha, Isroilning havo zarbalari oqibatida Larijoniy bilan birga uning oʻgʻli Murtazo hamda qoʻriqlash xizmati rahbari Alirizo Bayat ham halok boʻlgan.

“Larijoniy Pardis tumanidagi qizining uyida oʻgʻli, oʻrinbosarlaridan biri va bir necha tansoqchilari bilan birga halok boʻldi”, deyiladi matbuot xizmati xabarida.

Eron Prezidenti Masʼud Pezeshkiyon hamda Islom inqilobi qoʻriqchilari korpusi Larijoniy vafoti munosabati bilan hamdardlik bildirib, bunga javoban “qattiq qasos olinishi”ni vaʼda qilgan.

Maʼlumotlarga koʻra, Ali Larijoniy Eron oliy rahbari Ali Xomanaiy halok boʻlganidan keyin oʻldirilgan eng yuqori lavozimli amaldor hisoblanadi.

“The New York Times” nashrining yozishicha, AQSH va Isroil hujumlaridan oldin Larijoniy amalda mamlakat rahbariga aylangan va unga namoyishlarni bostirish hamda ehtimoliy urushga tayyorgarlik koʻrish vazifasi yuklatilgan. Shuningdek, u Tehronning asosiy hamkorlari — Rossiya, Qatar va Ummon bilan aloqalarni muvofiqlashtirgan hamda AQSH bilan Eron yadro dasturi boʻyicha muzokaralarga masʼul boʻlgan.