Sirdaryo viloyati hokimligining zaxira mablagʻi hisobidan respublika “Nuroniy” jamgʻarmasining Sirdaryo viloyati boʻlimi “Yutong” rusumli yangi avtobus bilan taʼminlandi. Ushbu avtobus uzoq safarlar uchun zarur barcha qulaylikka ega boʻlib, metan gazga moslashtirilgan va bir yonilgʻi zaxirasi 700 kilometrga yetadi.

Yangi avtobusning ilk sayohat yoʻnalishi Nurotadagi “Chashma” ziyoratgohiga boʻldi. Unda har bir shahar-tumandan toʻrt nafardan nuroniy qatnashdi. Maʼlum qilinishicha, bu avtobusdan har bir tuman-shahar nuroniylari maxsus jadval asosida navbat bilan foydalanishi ham yoʻlga qoʻyiladi. Faqat mamlakatimizgagina emas, qoʻshni davlatlarga ham sayohatlar tashkil etiladi.

— “Nuroniy” jamgʻarmasining Sirdaryo viloyati boʻlimiga sayohat avtobusi olib berilgani juda xayrli ish boʻldi, — deydi mehnat faxriysi, Oʻzbekiston Jurnalistlar uyushmasi aʼzosi Suyun Nomozov. — Endi ushbu transport vositasi tufayli otaxon va onaxonlar ishtirokidagi sayohatlar yanada koʻpayadi. Natijada bunday qiziqarli safarlarda har yili yuzlab nuroniylarning ishtirok etishi taʼminlanadi.

Ahmadali ShERNAZAROV

“Xalq soʻzi”.