Prezidentimiz Shavkat Mirziyoyevning Tojikistonga rasmiy tashrifi mamlakatlarimiz oʻrtasidagi madaniy-maʼrifiy, adabiy aloqalarni ham yangi bosqichga koʻtardi.

Darhaqiqat, oʻzbek va tojik xalqlarining bu yoʻnalishdagi hamkorligi oʻta rang-barang va serqirra boʻlib, tarixiy-madaniy mushtaraklik, urf-odatlar va turmush tarzidagi oʻxshashlik asosiga qurilgan.

Gazetamizga onlayn intervyu bergan tojikistonlik ziyolilar ham bu jihatni alohida eʼtirof etdi.

Munavvara OYMATOVA, Xoʻjand davlat universiteti oʻqituvchisi, shoira:

— Keyingi yillarda Oʻzbekiston va Tojikistonda ikki xalqning madaniyati hamda sanʼatini oʻrganishga, oʻzaro boyitishga katta eʼtibor qaratilmoqda. Oʻzbekiston Prezidentining tashrifi davomida imzolangan hujjatlar bu borada yana-da keng imkoniyatlar eshigini ochdi. Xususan, Madaniy-gumanitar hamkorlik toʻgʻrisidagi bitim xalqlarimizning maʼnaviy aloqalarini mustahkamlash, yoshlarimizni umumiy manfaatlar atrofida jipslashtirishga yoʻnaltirilgan qator loyihalarni koʻzda tutadi.

Oʻzbekistonda tojik tilida gazeta va jurnallar chop etilishidan, telekoʻrsatuv va radioeshittirishlar efirga uzatilishidan xabarimiz bor. Ularni Tojikistonda ham muntazam kuzatib borishadi. Taʼlim tojik tilida olib boriladigan maktablar, bir qator oliy oʻquv yurtlarida shunday fakultet va boʻlinmalar faoliyat yuritishidan esa doimo gʻururlanamiz.

Tojikistonda ham oʻzbek qardoshlarimizning maʼnaviy-maʼrifiy faoliyati, yoshlarning bilim olishi uchun barcha qulaylik yaratilgan. Xususan, Xoʻjand shahrida Oʻzbek maʼnaviyati va maʼrifati markazi, mahalliy universitetda oʻzbek filologiyasi boʻyicha mutaxassislar tayyorlaydigan ilmiy maktab faoliyat yuritib kelmoqda.

Uzoq tarixga va mustahkam ildizlarga ega oʻzbek-tojik adabiy aloqalari ham bugun izchil boyib bormoqda. Oʻzbek va tojik ijodkorlari bir-birining asarlaridan ilhom olib, oʻlmas asarlar yaratib kelishayotgani soʻzimiz isbotidir.

Prezident Shavkat Mirziyoyevning Tojikistonga tashrifi davomida anʼanaviy faol gumanitar almashinuvlarni davom ettirishga kelishib olinganidan behad quvondik. Oʻzbekiston rahbari diplomatik munosabatlar oʻrnatilganining 30 yilligiga bagʻishlangan qoʻshma madaniy tadbirlar dasturini amalga oshirish, shuningdek, ikki mamlakat yoshlari festivalini tashkil etish boʻyicha bergan taklifi bizni juda xursand qildi. Bularning barchasi doʻst, birodar xalqlarimiz oʻrtasidagi rishtalarni yana-da mustahkamlashga xizmat qiladi.

Hasanboy GʻOYIB, shoir va tarjimon, “Tojikiston Respublikasi matbuot aʼlochisi” unvoni sohibi:

— Azaldan oʻzbek ijodkorlarining Tojikistonda, tojik ijodkorlarining Oʻzbekistonda kitoblari chop qilib kelingan. Shu bois bugungi kunda ham oʻzbek adabiyotining Tojikistonda, tojik adabiyotining Oʻzbekistonda muhiblari talay, desam, xato boʻlmaydi.

Oʻzbekiston Prezidenti Shavkat Mirziyoyev Tojikistonga tashrifi chogʻida Dushanba va Toshkentda zamonaviy oʻzbek va oʻzbek adabiyotining tanlangan asarlari — antologiyalarini nashr etish taklifini ilgari surgani shu jihatdan xalqlarimiz uchun juda quvonarli voqea boʻldi.

Adabiyot va sanʼat hamisha xalqlar yaqinlashuviga xizmat qilishini anglagan mamlakatlarimiz rahbarlarining oʻzbek-tojik shoirlarining asarlari alohida kitob holida chop qilinishi, taqdimotlar oʻtkazilishi, badiiy kechalari tashkil qilinishida ham bosh boʻlishiga ishonchimiz komil.

Darhaqiqat, oʻzbek va tojik ikki tilda soʻzlashadigan bitta millat, degan naql bejiz paydo boʻlmagan. Dinimiz, qadriyatlarimiz bir, eng kichik odatlardan tortib toʻyu maʼrakalardagi marosimlarimizgacha oʻxshash. Shu bois tojik va oʻzbek xalqlari ogʻzaki ijodidagi insonparvarlik gʻoyalari, tinch hayot kechirishga intilish, zulmu istibdodga qarshi kurash, roʻzgʻor yuritish odatlarini koʻrsatib bergan folklor janrlari umumiy xususiyat kasb etgan. Katta hajmli “Goʻroʻgʻli” dostoni hamda boshqa rivoyatu afsonalarning tojikcha va oʻzbekcha variantlarining mavjudligi ham bu xalqlar asrlar davomida hayot voqealariga bir nigoh bilan qaraganligini koʻrsatadi.

Bugungi kunda nafaqat katta avlod vakillari, balki oʻzbek va tojik yosh ijodkorlari oʻrtasida ham doʻstlik rishtalari mavjud. Biz yaqin yillar ichida Tojikistonda oʻzbek yosh ijodkorlarining ijodiy namunalarini tojik tiliga oʻgirishni hamda toʻplam holida chop qilishni reja qilganmiz.

Rahmatjon BOBOJONOV
(“Xalq soʻzi”) yozib oldi.