Boysun davlat oʻrmon xoʻjaligida dov-daraxtlar bilan qoplanmagan 366,5 gektar lalmi yerdan samarali foydalanish boshlandi. Bu tashabbus oziq-ovqat xavfsizligi, aholi bandligi va iqtisodiy barqarorlikni taʼminlashda muhim qadam boʻlmoqda.

Yuqori Machay mahallasidagi togʻ bagʻrida dehqon Mengli Murtazoyev 7 gektar boʻsh yerda kartoshka yetishtirishga kirishdi. U buloq suvini 3 km masofadan quvur orqali olib kelib, yerni obod qildi va 10 nafar yoshni ish bilan taʼminladi.

— Yer unumli ekan, kelgusi oyda hosilni yigʻamiz, — deydi M.Murtazoyev. — Bu yil 500 million soʻm daromad kutayapmiz. Kelgusida ekin maydonini kengaytirib, 100 ta ish oʻrni yaratish niyatimiz bor.

Oʻrmon xoʻjaligi rahbari Shamsiddin Ostonaqulovning aytishicha, foydalanilmayotgan yerlarda aholining kartoshka yetishtirishga qiziqishi ortmoqda. Xoʻjalikning Kengdala qishlogʻi hududidagi 1,5 gektar yer maydonida parvarishlanayotgan kartoshkadan 60 tonna hosil kutilayapti.

Bunday saʼy-harakatlar yuqori hosildorlik bilan birga, aholi daromadini oshirishga, yangi ish oʻrinlari ochilishiga xizmat qilmoqda.

Farhod ESONOV

“Xalq soʻzi”