Foto: Xalq soʻzi

Koʻp yillar turli sohalarda faoliyat yuritib, katta hayotiy tajribaga ega, bosib oʻtgan hayot yoʻli boshqalarga ibrat boʻladigan, xalq orasida oʻziga xos obroʻ va eʼtibor topgan keksalarning tajribasini keng yoyish maqsadida Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasi tashabbusi bilan “Bir nuroniy oʻn yoshga masʼul” loyihasining Namangan viloyat bosqichi oʻtkazildi.

Bu loyihaning shahar va tuman bosqichlarida oʻtkazilgan tanlov gʻoliblari yakunlovchi bosqichda viloyat sharafini himoya qilish maqsadida uchta shartda oʻzaro bellashdilar.

Tadbir jarayonida qatnashchilar bilim va koʻnikmalari, amalga oshirayotgan ishlarini namoyish qilib, oʻzaro tajriba almashdilar. Yakunda Yangiqoʻrgʻon tumani “Vodiy” mahalla fuqarolar yigʻini keksalar maslahat guruhi rahbari Dilorom Isomiddinova birinchi oʻringa munosib topildi. Keyingi faxrli oʻrinlarni Uychi tumani “Qumtepa” mahallasi vakili Maʼrufjon Yoʻldoshev va Kosonsoy tumani “Guliston” MFYdan Basidaxon Muhammadiyeva egalladilar.

— Yurt taqdiriga befarq boʻlmagan keksalar bugun “Bir nuroniy oʻn yoshga masʼul” loyihasining viloyat bosqichida ishtirok etdilar, —deydi “Nuroniy” jamgʻarmasi viloyat boʻlimi raisi Ikromxon Najmiddinov. — Tadbirni tashkil etishdan asosiy maqsad keksalarimizning yoshlar tarbiyasidagi tajribalarini oʻrganish eng samaradorlarini ommalashtirishdan iborat edi. Zero, ayni sohadagi ishlarni puxta yoʻlga qoʻyish orqali mahallalarda oilalar ajrimini kamaytirish, jinoyatchilikning oldini olish, aholi bandligini taʼminlash hamda xalqimiz oʻrtasida sogʻlom turmush tarzini tashkil qilishga erishamiz.

Loyihada ishtirok etgan barcha nuroniylarga tashkilotchilarning esdalik sovgʻalari va pul mukofotlari topshirildi.

                                                          Qudratilla NAJMIDDINOV, “Xalq soʻzi”.