Yurtimizda “Inson qadri uchun” tamoyili asosidagi islohotlar har bir hududda samarasini bermoqda. Bu jarayonda ota-onasidan erta ayrilgan yoshlarga alohida mehr, gʻamxoʻrlik koʻrsatib kelinayotgani ham eʼtiborga molik. Ularning taʼlim olishi, kasb egallashi, ish va uy-joy bilan taʼminlanishi kabi masalalarni davlatimiz oʻz zimmasiga olgan.

Bu boradagi xayrli ishlar doirasida Beruniy tumanida 2025-yil davomida 8 nafar ota-ona qaramogʻidan mahrum boʻlgan yoshlarni uy-joy bilan taʼminlash belgilangan.

Istiqlol bayrami arafasida “Inson” ijtimoiy xizmatlar markazi tuman boʻlimi masʼullari tomonidan hozirda oliy taʼlim muassasasi talabasi boʻlgan Suxrob Yuldashevga bir xonali, barcha qulaylikka ega uyning kaliti tantanali ravishda topshirildi.

— Men kabi yoshlarning eng katta orzusi oʻz uyiga ega boʻlish hisoblanadi, — deydi Suxrob. — Davlatimizning bizga gʻamxoʻrligi natijasida minglab yoshlarning orzusi roʻyobga chiqmoqda. Bu uy men uchun bayramga ajoyib sovgʻa boʻldi. Endi boshqa ishlarga chalgʻimasdan oʻz mutaxassisligim boʻyicha yetuk kadr boʻlishga harakat qilaman. Shu tariqa Vatanimiz taraqqiyotiga munosib hissa qoʻshishga vaʼda beraman.

Gʻayrat OTAJONOV

“Xalq soʻzi”.