Said DONISHEV/“Xalq soʻzi”. Bir paytlar Arnasoy tumani desa koʻz oʻngimizga asosan paxta va gʻalla yetishtiriladigan, yerini shoʻr bosgan choʻl hudud kelar edi. Hozir esa, Arnasoy iqtisodiy koʻrsatkichlari yaxshilanib borayotgan, chet el investitsiyasi faol jalb qilinayotgan tumanlar sirasiga kirib ulgurdi. Bu maskanning tadbirkor insonlari har jabhada faqat oldinga intilayotgani hududning yorqin kelajagidan dalolatdir.

Prezidentimizning 2022-yil 2-noyabrdagi “Issiqxona xoʻjaliklari faoliyati samaradorligini oshirish yuzasidan qoʻshimcha chora-tadbirlar toʻgʻrisida”gi qarori ijrosi ham mazkur tumanda namunali yoʻlga qoʻyilgan. Xususan, Gʻafur Gʻulom nomli mahalla fuqarolar yigʻinida istiqomat qiluvchi tadbirkor Olim Shaminov oʻz xonadonidagi 2 sotix maydonda gidroponika usulida qulupnay yetishtirmoqda.

— Qulupnay parvarishi oʻta nozik ishlardan biri hisoblanadi. Har bir agrotexnik tadbirni oʻz vaqtida, sifatli amalga oshirish talab etiladi. Issiqxonadagi issiqlik ham meʼyorida boʻlishi muhim. Bundan tashqari, nav tanlashga alohida eʼtibor qaratish kerak. Tanlangan nav yerning tarkibi, unumdorligiga, ekilgan hudud iqlim sharoitiga mos boʻlmasa koʻzlagan hosilni olib boʻlmaydi, — deydi O. Shaminov.

Tadbirkor hozir yetishtirgan qulupnaylarini asosan ichki bozorga, savdo majmualariga yetkazib berib, yaxshigina daromad olmoqda.