9-avgust kuni Global Jewish Assistance and Relief Network (AQSH) jamgʻarmasi tomonidan begʻaraz yordam sifatida taqdim etilgan tibbiy niqoblarining birinchi qismi Oʻzbekistonga keltirildi, deb xabar beradi “Dunyo” agentligi.

Hozirda umumiy qiymati 330 ming dollardan ziyod boʻlgan qariyb 270 ming dona tibbiy niqoblarning 134 ming 400 donasi olib kelingan. Undan 165 ming donadan ortiq N95 respiratorli niqoblar, 4 ming dona KN95 va 100 ming dona uch qavatli niqoblar oʻrin olgan.

Taʼkidlanishicha, gumanitar yordam respublikada koronavirusning yangi toʻlqini sabab kuzatilayotgan ehtiyojni qondirishda koʻmak maqsadida yuborilgan.

Xabarga koʻra, ushbu insonparvarlik yukini Oʻzbekistonga yuborish xarajatlari Pensilvaniya shtati Filadelfiya shahrida tadbirkorlik faoliyatini olib borayotgan oʻzbekistonlik Furqat Rajabov hisobidan qoplangan.

“Butun yer kurrasini qamrab olgan koronavirus pandemiyasi bilan bogʻliq vaziyat hech birimizni befarq qoldirmaydi. AQSH jamgʻarmasi tomonidan taqdim etilgan tibbiy niqoblarning dastlabki turkumini yurtimizga yuborishga hissa qoʻshganimizdan mamnunmiz”, deydi Rajabov.

“Tibbiy niqoblar oʻrnatilgan tartibda respublikaning tegishli tibbiyot muassasalari oʻrtasida tarqatiladi. Shuningdek, niqoblarning ikkinchi turkumi ham tez kunlarda Oʻzbekistonga olib kelinadi”, deyiladi xabarda.