Davlatimiz rahbari Andijon viloyatiga tashrifi chog‘ida har bir oilalardagi turmush madaniyatini shakllantirish, yashash sharoitini yaxshilash maqsadida viloyatda “Har bir oila – tadbirkor” dasturini ishlab chiqish bo‘yicha topshiriq bergandi.

Ushbu dastur ijrosini ta’minlash maqsadida O‘zbekiston Respublikasi Tiklanish va taraqqiyot jamg‘armasi hamda bir qancha xorijiy moliya institutlari tomonidan 100 million AQSH dollari yoki 800 milliard so‘m miqdoridagi mablag‘ ajratildi.

Ayni paytda ushbu mablag‘ aholining chorvachilik, quyonchilik, parrandachilik, baliqchilik, asalarichilik yo‘nalishlaridagi faoliyatlarini tashkil etish, issiqxonalar qurish, bog‘ va tokzorlar yaratish, sartaroshlik, kosmetologiya xizmati, kosibchilik, tunukasozlik, yog‘och va allyumin profildan eshik va romlar tayyorlash, zargarlik, avtoservis ustaxonalari ochish, qandolatchilik mahsulotlari ishlab chiqarish kabi 20 dan ortiq yo‘nalishlarga yo‘naltirilmoqda.

“Xonadonimda suv ta’minoti yaxshi yo‘lga qo‘yilgan. Bu mening baliqchilik bilan shug‘ullanishim uchun yaxshigina imkoniyat yaratadi. Hukumatimiz tomonidan berilayotgan imkoniyatdan unumli foydalangan holda intensiv usulda baliq parvarishlash bilan shug‘ullanishga qaror qildim”, - deydi Qo‘rg‘ontepa tumani istiqomat qiluvchi Abdurahim Xo‘jamberdiyev “Xalq so‘zi” muxbiri Saminjon Husanov bilan suhbatda.

Viloyat hokimligida tashkil etilgan ishchi guruhi a’zolari mavjud 878 ta mahalla fuqarolar yig‘inlarida bo‘lishib, fuqarolarning xohish – istaklari va imkoniyatlari o‘rganilyapti.