Foto: “Milliy tiklanish” partiyasi

«Milliy tiklanish» partiyasi yetakchisi Alisher Qodirov energetika sohasidagi monopoliya boʻlganligini va bu endi bekor qilinishini bildirdi. «Endilikda energiya ishlab chiqarish va sotishda monopol mavqe boʻlmaydi», degan u.

Maʼlum qilinishicha, Oʻzbekiston energetika sohasiga jiddiy oʻzgarishlar olib kiradigan «Energetika toʻgʻrisida»gi qonun loyihasi partiya fraksiyasining 8-iyuldagi navbatdagi yigʻilishida ikkinchi oʻqishda maʼqullangan.

«Mobil aloqada xizmat koʻrsatadigan kompaniyani tanlaganingizdek energiya sotadigan kompaniyani ham tanlash huquqingiz boʻladi. Energiya ishlab chiqaruvchi va sotuvchi kompaniyalar orasida raqobat boʻladi. Amaldagi qonunda bu taqiqlangan edi. Monopolist tashkilot bizga xohlagan narxida elektr energiya yetkazib berar va biz toʻlamay qolgan qismini byudjetdan «qurtday» sanab olar edi», deydi Alisher Qodirov.

Ushbu qonun loyihasi bilan elektr energiyasini ishlab chiqarish, uzatish, taqsimlash, saqlash, elektr energiyasi bilan taʼminlash, markaziy xaridorning funksiyalarini bajarish, elektr energiyasi savdosi, importi va eksporti litsenziya asosida amalga oshirilishi belgilanmoqda.

Avvalroq, Alisher Qodirov daromadi 5 milliondan yuqori qatlamga imtiyozli narxdagi 200 kVt norma qoʻllanilmasligini soʻrab chiqqan edi.