Bugungi kunda 2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi doirasida mamlakatda izchil amalga oshirilayotgan islohotlar oʻz samarasini koʻrsatib, erishilayotgan natijalarni xalqimiz bilan birga jahon hamjamiyati ham eʼtirof etmoqda.

Darhaqiqat, Harakatlar strategiyasi bugungi globallashuv sharoitida yer yuzida tub oʻzgarishlar kechayotgan murakkab bir vaziyatda, Oʻzbekiston uchun siyosiy, huquqiy, iqtisodiy, ijtimoiy islohotlarning eng muhim besh ustuvor yoʻnalishini amalga oshirishning yaqin istiqbolga moʻljallangan muhim milliy strategik hujjatidir.

“Taraqqiyot strategiyasi” markazi tomonidan Harakatlar strategiyasi, shuningdek, mazkur hujjat asosida qabul qilinib kelingan har yilgi Davlat dasturlarining qanday amalga oshirilayotgani va ijrosi qay tarzda taʼminlanayotgani haqida bir qator infografik risolalar va boshqa targʻibot materiallari tayyorlanib, milliy va xalqaro jamoatchilikka taqdim etib kelinmoqda.

Mazkur toʻplamda ham Harakatlar strategiyasi doirasida 4 yil davomida amalga oshirilgan chora-tadbirlar natijasida kuzatilgan muhim ijtimoiy-siyosiy va ijtimoiy-iqtisodiy oʻzgarishlarni raqamlardagi qiyosiy tahlili yoritib berilgan.