“Tez yordam” koʻrsatuvida Innovatsion sogʻliqni saqlash milliy palatasi vakili Klara Yodgorova gidroksixloroxin dorisining zarari haqida gapirdi: «Pandemiya avvalida koronavirusni davolash uchun aniq dori vositasi yoʻq edi. Shunda xloroxin, gidroksixloroxin, azitromitsin kabilarni qoʻllash boshlandi.

Oʻrganishlar natijasida olimlar bu dorilarning nafaqat samara bermasligi, balki bemorlarda oʻlim xavfini oshirishi mumkinligini aniqlashdi.

Oʻzbekistonda 13-iyul kuni Sogʻliqni saqlash vaziri buyrugʻi bilan tasdiqlanib, chop etilgan qoʻllanmada gidroksixloroxin olib tashlangan.

Koʻrsatuvda gidroksixloroxin oxirgi davolash qoʻllanmasidan chiqarib tashlangan boʻlsada, uyda davolanayotgan bemorlarga tarqatilishi kutilayotgan dorilar toʻplamiga kiritilganicha qolayotgani aytildi.

Klara Yodgorova:

«Oʻzbekistondagi barcha tibbiyot muassasalari — SSV tizimidagi shifoxonalar ham, xususiy shifoxonalar ham oxirgi tasdiqlangan davolash qoʻllanmasiga rioya qilgan holda ish koʻrishi shart.

Oʻylaymanki, respublika maxsus komissiyasi yangi qoʻllanmaga asoslangan holda bepul tarqatiladigan dorilar toʻplamini qayta koʻrib chiqib, bu dorini tarqatishni toʻxtatadi».