Illyustrativ surat

Irvayndagi Kaliforniya universiteti olimlari atmosfera havosidagi bulutlarning paydo boʻlishida ishtirok etadigan va odamlarda xavfli astmani keltirib chiqaradigan koʻplab nanoqismlar, aslida, qoʻziqorin sporalari ekanligini aniqlashdi. Bu haqda “Science Alert” xabar berdi.

Aytilishicha, 2016-yilda tadqiqotchilar Oklaxoma shtatida bir oy davomida diametri 20-60 nanometr boʻlgan zarrachalarni ushlaydigan asbobdan foydalanib, ularni tutishgan, keyin esa yupqa platina ipiga joylashtirishgan. Molekulalar bugʻlangandan soʻng yuqori aniqlikdagi spektrometr hosil boʻlgan gazlarni tahlil qilgan va ularning kimyoviy tarkibini aniqlagan.

Olimlarning fikriga koʻra, havoga koʻtariladigan sporalar suv yutadi, shishadi va 30 nanometr diametrli boʻlaklarga boʻlinadi (ular diametri ming nanometrga teng hujayralardan ancha kichikdir).

Nanoqismlar suv molekulalari birikadigan yadrolar rolini oʻynaydi, shundan soʻng muz kristallari paydo boʻlib, ular oʻz navbatida, bulutlarni hosil qiladi.

Shundan soʻng ushbu zarralar oʻpkaga ancha chuqur kirib boradi. Mutaxassislar baʼzi odamlarda yomgʻir paytida astma xurujlarining boshlanishini ayni shu omil bilan izohlashmoqda.