Soʻnggi vaqtlarda ijtimoiy tarmoqlar orqali “Bojxona skladi”, “Bojxona musodara tovarlari” va shunga oʻxshash boshqa nomlar bilan ochilgan soxta sahifalar orqali firibgarlik holatlari kuzatilmoqda.

Ushbu sahifalarda bojxona organlari tomonidan toʻxtatib qolingan va davlat egaligiga oʻtkazilgan tovarlar hayratlanarli darajada arzon narxlarda sotilayotgani maʼlum qilinadi.

Oʻzbekiston Respublikasi Davlat bojxona qoʻmitasi yuqoridagi kabi soxta sahifalarda eʼlon qilinayotgan tovar va xizmatlar haqidagi xabarlarga ishonib, nomaʼlum kimsalarga pul mablagʻlari oʻtkazmaslikka chaqirdi.

Maʼlum qilinishicha, har qanday musodara qilingan tovarlar sud qaroriga asosan Bojxona servis davlat muassasasiga qarashli doʻkonlarda sotuvga chiqariladi.

Shuningdek, Davlat bojxona qoʻmitasi firibgarlarning yangi turdagi aldov holatlaridan ham ogoh boʻlishga chorlagan.

Masalan, fuqaroga ijtimoiy tarmoqlar orqali “Sizga chet eldan yuz ming dollar meros qoldirilgan. Bojxonada turibdi. Uni olish uchun 9 mln toʻlashingiz kerak” kabi xabarlar kelish holatlari kuzatilmoqda.

Qoʻmita bunday xabarlar firibgarlarning navbatdagi tuzogʻi hisoblanib, hech bir rasmiy idoralar meros yoki yuk uchun oldindan toʻlov talab qilmasligini eslatib oʻtgan.